free page hit counter
اخبار محلية

ڨالوا سيف هرب!!!!!!! بقلم نصرالدين السويلمي

ڨالوا سيف هرب!!!!!!!

ڨولوا انتحر..اغتال.. خرّب.. قرصن.. جن.. هبل.. طلق..عرس.. يا سيدي قولوا عدد.. ڨولوا ڨاجا فيلاّرمي…..
اما ما تڨولوش هرب لاني كلمة عيب عند الرجال..
أي زادة ما تڨولوش ثورة مضادة لاني كلمة تتعاير بيها الاجيال..
زادة ما تڨولوش براميل متفجرة، لانو ثم يولي لالو من ربي لالو من عبادو..
ڨولوا شفناه مع كارلوس مع هتلر مع البغدادي مع كيم جونغ…. برك ما تڨولوش شفناه مع محمد بن زايد…
ڨولوا راهو جاء يساعد في الثورة شوي عماها، أي توقع مهمش متسرع مطفوش..
أما تڨولوش حب يطيح الثورة ويرجع للزريبة..
لأني الرجال تغفص أما ما تخونش
نعرف صعيب ياسر باش تفرقوا بين الاخطاء وبين العار، بين الجريمة وبين الشنار..
كل راجل ممكن يغلط ممكن يرتكب جريمة، أما الراجل عمرو ما يلحّڨ لذري ذريه العار..
عمرو ما يتآمر على ثورة جت من وراء البلاكات، جابها الدم والعرڨ والفقر..
الراجل يا جماعة عمرو ما يسبح في شط يسبح فيها محمد بن زايد وحفتر وعبد الفتاح السيسي وبشار… يموت متحمل ذريه في واد هرهار وما يعملهاش…
وحتى كان دخلت حديث في حديث..
هذا شاب جاي من قلب الثورة مازال بعرڨو..اكرمو ربي يدافع على هوية شعبو، وزاد اكرمو ربي يدافع على ثورة شعبو، وزاد اكرمو ربي يدافع على كل ثورات الشعوب العربية المستضعفة.. وفتح ربي بصيرتو ما حلّش حكك السلتيا ابتهاجا واحتفالا بدم الصبايا الي سال وديان في رابعة!
والي معاه شاعر عرفاتو السجون وعرفها، كاتب قليل الجهد صعيييييب يفهم كتاباتو، منحاز للثورة وللهوية وهذي نعمة كبيييييييرة يشكر عليها ربي سبحانو.
زيد.. الي معاه هذاكا ما ڨتلش صواردو في القرعة والمايدة، راجل طبيب وخطيب جاي من بيت الله، راجل ارتضته مدينة الاصالة والعراقة، استانست بيه صفاقس باش يئم شيبها وشبابها رجالها ونساها واطفالها..راجل تصلي معاه الناس مشي تسكر معاه الناس.
لو كان جيت ناطق بلسان الائتلاف، نقلكم كلمة وحدة لا اكثر:
راهو عيب .. عيب كبييييييير.. علاش تبعثوا لينا في الغلمان متاعكم؟ اخرجوا الينا نظرائنا.. واذا ما لقيتوش لينا نظراء ، اعملوا في ڨلوبكم واصنعوا نظراء خير ليكم من الطلفيح مرة وراء عبير ومرة وراء قيس.

نصرالدين السويلمي

اظهر المزيد

مقالات ذات صلة

اترك تعليقاً

زر الذهاب إلى الأعلى
error: Content is protected !!