free page hit counter
اخبار محلية

صرخة مفزعة من توانسة في الصين: رانا اولادكم نحبو نروحو لتونس …عاونونا يرحم والديكم

على سلامتكم يا توانسة. كنت ناوي اليوم نعمل live ولا نهبط فيديو على Facebook نحكيلكم فيه بالتفصيل شنوة قاعد يصير معانا الجالية التونسية في ووهان ووين وصلت حكاية خروجنا. الله غالب ما نجمتش خاطر الصين مانعة وسائل التواصل الاجتماعي هوني (Facebook , messenger, WhatsApp , Instagram,etc..) وبما انو حتى vpn معادش يخدملي في ووهان، كل مرة نصب app فماش ما يخدملي و نشوف شصاير في تونس و العالم. سامحوني بش نطول عليكم المرة هاذي أما راهو يلزمني نوصل صوتي و تسمعوني.

نهار اللي وصلنا خبر تسكير ووهان و منعوا الدخول و الخروج لمينا بعضنا ال 14 تونسية و تونسي هنا في WeChat group و حطينا معانا ممثل للسفارة في بكين. اخترنا انو مدام عفاف و سيف عزيز يحكيوا باسمنا مع السفارة و طلبنا إجلاء التوانسة اللي عايشين هوني في ووهان وين خرج فيروس corona virus و تفشى في الصين و العالم الكل. بعثولنا emails و قالولنا هانا معاكم متابعين تستحقوا حاجة كلمونا راكم ولادنا، باهي يعطيهم الصحة. زدنا عاودنا معاهم و سمعنا اللي فما دول أخرى منها عربية قاعدين يتواصلوا مع جالياتهم بش يروحوا بهم منها امريكا و بريطانيا و المغرب و الأردن و الجزائر و غيرهم، قالولنا باهي نثبتوا في المعلومة و كان هكا احنا زادة نخرجوكم، انا و احد من الناس فرحت كلمت عائلتي و بشرتهم اللي انا مروح كان طالت نهار الاثنين. عاودوا الجماعة كلموا السفارة قالولهم شنوة جديد عندكم بش تجيبولنا طيارة تروح بينا لتونس؟ قالوا احنا هنا عددنا صغير و تونس مش بش تبعث طيارة، كان هكة ندخلوا باص لووهان يلمكم الناس الكل يخرجكم لشنغهاي من غادي تقصوا تساكر و تروحوا و فما احتمال يعملولكم حجر صحي في شنغهاي ولا كي توصلوا لتونس لمدة جمعتين. باقي قلنا ميسالش الفايدة الواحد يروح و يمنع من الموت. قالولنا نستناو الحكومة الصينية ياخذوا منها autorisation كان هكا يجيونا و نقصدوا ربي و نروحوا. مع الأسف ليلتها وقع حظر تجول على الطرق السيارة الكل اللي تتعدى بووهان وكانت نهاية أسبوع فقلنا نستناو يوم الاثنين كيما فهمنا من عندهم. تنشرت الحكاية و سمعتونا في تونس، قلت هاو بش تتحل و نروحوا. كلموني السفارة بالاثنين سألوا عليا يرحم والديهم و قالولي اللي اختي كتبت حاجة عليهم أما انا وقتها مازال ما في بالي بشي. حليت نلقى صحابي نشروا الحكاية و صوتي وصل يعطيهم الصحة و قلت توة توصل للجهات المختصة و تعاون السفارة بش ينجموا يدخلولنا و يخرجونا و نعملوا حضر صحي في ظروف آمنة خصوصاً اللي واحد من المواطنين التوانسة هنا، ملايكة صغير اسمو هارون و عمرو عام.

البارح حكيت في قناة التاسعة و السيدة وزيرة الصحة بالنيابة موجودة و تسمع فيا، قلتهم اللي امريكا عندها الف مواطن في ووهان منهم دبلوماسيين خاطر عندها قنصلية هوني و خرجت رعاياها البارح بعد ما أعلمتهم قبل بأيام. ياخي هي قالت لازم التثبت من المعلومة. اليوم كلمت السفارة التونسية و اكدولي اللي امريكا خرجت جماعتها.
اليوم سمعنا اللي المغرب بش تخرج الجالية متاعها الايامات هذوما و المغاربة اللي على اتصال بالتوانسة قالوا اللي هما مستعدين يراسلوا سفارة المغرب بش يخرجوا التوانسة معاهم بما انو عددنا صغير. احنا فضلنا نكلموا سفارتنا بش هنا يتصلوا بالمغرب و يتفاهموا معاهم يخرجونا، فأنا واحد من الناس كلمت السفارة نستفسر على آخر المعطيات و بش نتثبت من معلومة خروج الأمريكان. قالولي مازلنا نتفاوضوا مع الصين و راهي الحكاية معقدة شوية، الأمريكان خرجوا خاطر عندهم كراهبهم في القنصلية مشاو بيهم للمطار و احنا مشكلتنا شكون يدخللكم و يخرجكم و يعمل حجر صحي معاكم، بالإضافة إلى ظروف الحجر ماناش ضامنينها لتو كيفاش.

قتلو اللي فما ولد بلادي من بني خلاد اسمو محمد علي يقرا في بكين كلمني و تطمن عليا يرحم والديه و قلي عندي رخصة قيادة صينية و انا مستعد نجي نخرجكم من ووهان و نعمل معاكم حجر صحي غير بركة السفارة توفرلي العربة. قالولي اللي المشكلة كي يجي يدخل لووهان يعملولوا حجر صحي بش يثبتوا فيه داخل مريض ولا لا. انا مانيش biologiste و نخلي الحكاية هذي لأهل الاختصاص أما راني من شيرتي قاعد نحاول نلقى حل بش نجموا نهربوا من هل الوباء اللي كل يوم نسمعوا حكاية و أعصابي بدات تتعب.
اليوم خاطرت بروحي و خرجت نلوج على حانوت محلول ولا خضار و لا عطار بش نشرب موونة خاطر ماعادش عندي برشة ماكلة، الدنيا صحراء!!!! درت يجي ساعة و نصف بش لقيت حانوت يبيع شوية غلة و حاجيات شريت شنوة نجم و روحت.

اظهر المزيد

مقالات ذات صلة

اترك تعليقاً

زر الذهاب إلى الأعلى
error: Content is protected !!