نشر الإعلامي سمير الوافي تدوينة نعى فيها الرئيس التونسي الراحل الباجي قايد السبسي الذي وافته المنية صباح يوم الخميس 25 جويلية 2019 تزامنا مع عيد الجمهورية.
وكتب الوافي تدوينته على حسابه الشخصي عبر فايسبوك:
“وانت رئيس حي وتحكم ساهل تجيب ناس تصفقلك وتهتف باسمك…تكريلهم كيران…تخدم الماكينة…حزبك يفرق الشوكوطوم والا الكسكروتات…وينجمو يجيوك المتملقين والمنافقين والانتهازيين…!
لكن كي تتوفى صعيب في ها السخانة القاسية يخرجو الناس في جنازتك تلقائيا…عاري ولابس…فقير وغني…زوالي وبورجوازي…رغم الظروف والسخانة والفقر وكره السياسة…الا ما تكون راجل إستثنائي ومحبوب برشة وعملت إنجازات في مسيرتك تغطيلك أخطائك…وخدمت البلاد أكثر ملي خدمت روحك…وفيك حاجات إستثنائية تخلي الزوالي يحبك ويبكي عليك ويتحمل السخانة والزحمة باش يودعك بدموعو…رغم ظروفو كانت قاسية في عهدك…لكنو يعترفلك بالجميل اللي قدمتو للبلاد والدولة…
في دول أخرى الرئيس يموت ويدفنوه في قبر مجهول وبلاش جنازة…أو يموت في المنفى أو في السجن أو مقتول أو يعملولو جنازة مسرحية باردة ومركبة بعدما يكون ولدو شد بلاصتو…!
لكن الفقيد الرئيس الباجي قايد السبسي مات في مستشفى عمومي…وطيلة مرضو الناس يدها على قلوبها خايفة عليه…وجنازتو مشاو فيها الزواولة قبل الرؤساء وبكاو عليه وودعوه بدموعهم…وجاو من غير كيران وماكينة وأحزاب ومقرونة وشكوطوم…جابتهم قلوبهم قبل ساقيهم…!
تنجم تشري شكون يصفقلك وانت تحكم لكن ما تنجمش تشري شكون يبكي عليك في جنازتك…هنيئا لك سيد الرئيس…والله يرحمك
-
-
-
-
-
-
-
-
