تونس – فيديو: إستياء كبير من آداء أمينة فاخت في إحدى الحفلات.. الاسباب
علّق التونسي غسان مولّى، اليوم الجمعة 14 جويلية 2023، على حفل خاص للتونسية أمينة فاخت.
وعبّر عن استيائه الكبير من تأخّر أمينة في الظهور وغضبه الشديد من آدائها.
وقال في تدوينة على حسابه الرسمي “فيسبوك”، “غلطة وندمان عليها…
دڤني ربّي ومشيت لأمينة فاخت
راني عمري في حياتي لا سبّيت فنّان ولا طيّحت من قيمتو بحكم أنّي نخدم في الميدان الفنّي و أحترم كل إنسان فنّان أمّا المرّة هاذي ما نجّمش…
المدام طلعت على الساعة 13:30 بالظبط يعني أقل واحد في الحاضرين ستنّاها 4 سوايع لا سامحوني لا شيء (ميسالش نجمو نتفهمو أسباب تقنيّة ولو أني ما نتصوّرش ولّا ما خلصتش في فلوسها ولّا لاهية في حاجة أخرى)
دخلت بغناية تغنّي على روحها أمينة أمينة شدّت فيها 11دقيقة وتشطح و تقولallez dansez .. aller chantez بعد ما كملت قالتلنا أنا حياتي الكل نعطي الليلة إنتوما اللي بش تعطيوني…
آش علينا…
بعد غنّات غناية أخرى خايبة (سامحوني ما عندي حتّى كلمة أخرى معبّرة) و ضربة فيها 9 دقائق
أي أكهو عاد… أفرڤ الحضبة… الناس طارتلها الشيخة وولّات تزفّر عليها وإلّي ولّا يخمّم في حق التسكرة إلّي مشات حرام والوجوه الكل مزبهلّة ماهيش مصدقة حياتها وبدات الناس تروّح.
جاوني جماعتي قالولي هيّا نروح .. قلت لا نزيدوها فرصة أخرة هاي بش تغنّي والا مرّة و تحفّلها… ياخي ولّات تغنّي على الڤيتارة على خاطر الروتور متاعها في الصوت مش مريڤل وإليكم المقطع.
هاني روّحت وحطّيت والا مرّة نسمع فيها في الكرهبة وأكهو.
تصير عالرجال أما هاني بلّغت على الأقل نمنّع ناس أخرى في فرص أخرى.
