أجور ضيوف برنامج رامز مجنون رسمي 2020م ..
أجور ضيوف برنامج رامز مجنون رسمي 2020م..
تداول رواد التواصل الاجتماعي قائمة تجمع أجور ضيوف رامز مجنون رسمي 2020م ،
جاء أعلى أجر من نصيب «علي معلول »لاعب النادي الأهلي ، حيث حصل على مليون دولار ،
يذكر أن برنامج رامز مجنون رسمي يعد الأغلى إعلانيًا فى قائمة البرامج المعروضة على شبكة قنوات إم بى سى لهذا العام ( mbc مصر ) ،
إذ يصل سعر 30 ثانية إعلان خلال البرنامج إلى 300 ألف جنيه ..
وعن اجور ضيوف رامز جلال فقد ارتفعت ليوافق الفنان أو الضيف على الظهور بالبرنامج ،
وفيما يلي أجور الفنانين ..
أجور ضيوف رامز مجنون رسمي 2020م ..
- حصلت الفنانة ياسمين صبري ، على مليون ونصف المليون جنيه
- بينما حصل لاعب النادي الأهلي على معلول على مليون دولار ،
- وحصل الفنان أمير كرارة ، نجم مسلسل الإختيار على مليون جنيه ،
- الفنانة غادة عادل ، 500 ألف جنيه
- الفنان أحمد العوضي ، نجم مسلسل الإختيار 300 ألف جنيه ،
- جوهرة ، نصف مليون دولار ،
- الفنان أحمد السقا ، حصل على مليون جنيه ،
- درة ، نصف مليون دولار ،
- الفنانة نيللي كريم ، حصلت على 400 ألف جنيه ،
- الفنانة هنادي مهنا ، حصلت على 120 ألف جنيه ،
- الفنان محمد هنيدي ، 400 ألف جنيه ،
- عادل شكل ، 50 ألف جنيه ،
- الفنانة هبة مجدي ، حصلت على 250,000 جنيه ،
- اللاعب محمد الشناوي ، حارس مرمى النادي الأهلي * ومنتخب مصر حصل على 700 ألف جنيه ،
- حسن شاكوش ، 300 ألف جنيه ،
- الفنانة أنغام ، حصلت على 240 ألف جنيه ،
- حمو بيكا ، 200000 جنيه ،
- لاعب الزمالك أشرف بن شرقي ، حصل على 700 الف دولار ،
- لاعب نادي الزمالك طارق حامد ، حصل على نصف مليون جنيه ،
- الكابتن السيد عبد الحافظ ، حصل على 250,000 جنيه ،
- الفنان أشرف عبد الباقى ، حصل على 120 الف جنيه ،
- الفنانة ياسمين رئيس ، حصلت على 240 ألف جنيه ،
هذه هي القائمة المتداولة والتي لم ترصد باقي أجور الضيوف ولم يتم الإعلان عنها بشكل رسمي من قبل إدارة البرنامج ..
عرفتوا ليه بيقبلوا البهدلة والإهانة والمرمطة ويسكتوا بعد إللى بيتعمل فيهم ..
كل ده علشان الفلوس .. رغم إنهم معاهم فلوس كتير ومش محتاجين ..
مع العلم إن فيه ناس كتير محتاجة بس كرامتهم عندهم اهم كتير من كنوز الدنيا ..
عرفتوا الناس إللى بيسموا نفسهم نجوم بيبيعوا نجوميتهم بكام ومش بس نجوميتهم إللى بيبعوها لأ دا كمان بيبيعوا …….
لا حول ولا قوة إلا بالله العلي العظيم …
وممكن حد يقولى هم عارفين المقلب وموافقين وبيمثلوا وده بيعتبروه عمل فنى لإظهار التعبيرات وردود أفعال تجذب جمهورهم … طيب ماااااااشى ..
وممكن حد كمان يقولى إنت مكبر الموضوع ليه دا عمل كوميدى مسلى وبيضحكنا فى عز الكآبة إللى إحنا فيها دى … طيب مااااااشى ..
طب أرد انا بقى ..
ممكن حد فيكم يقولى إيه المحتوى إللى بيتقدم فى عمل بيتكلف الملايين … ؟
غير طبعا السخافة والإستظراف وثقل الدم من ذلك المخلوق المريض ..
والسادية والعدوانية إللى بيتعلمها أطفالنا من ذلك المخلوق ..
والتنمر والسخرية من ضيوفة ..
والتعليقات السخيفة والإفيهات البايخة إللى بيرميها ذلك المخلوق ..
يا جماعة دا شخص لازم يتعمله إعادة تأهيل ويتعالج ..
بس أرجع وأقول العيب مش عليه
ما هو باع نفسه بالفلوس زى ما غيره كتير من ضيوفه باعوا نفسهم برضه بالفلوس ..
الفلوس إللى بندفعها إحنا من شقانا وغصب عننا لما صاحب السلعة إللى بيعلنوا عنها من خلال إعلانات البرنامج بيحمل تكلفة الإعلانات دى على السلعة إللى إحنا بنشتريها ..
ونرجع نشتكى من غلاء الأسعار ..
يا عم انا مش عاوز اضحك على برنامج تافة دقايق وبعدين اعيط طول الشهر على المرتب إللى مش مكفى اشترى بيه إحتياجاتى الأساسية انا واسرتى …
وأخيرا أحب اقولكم إن إحنا كمان مشاركين فى هذه المهزلة لما بنتفرج عليه ونعمله نسبة مشاهدة عالية …
لكى الله يا مصر .. ولك الله يا شعب مصر .. ولك الله يا رئيس مصر …
مواطن مصري
.