صفقات سرية مع محمد بن زايد.. ربي يستر الثورة! بقلم نصر الدين السويلمي

صفقات سرية مع محمد بن زايد.. ربي يستر الثورة!

ڨال اعداء الدستور.. انتهك الدستور، شلكو عبث بيه
ڨال يكذبو.. جاب اكبر كذبة في تاريخ تونس، مسرحية كاملة متاع جواب مسموم
ڨال يستعملو في مؤسسات الدولة.. بركْ ثم عند العسكر باش يعملو ليه انقلاب حتى لخرجو ليه الجنرالات سحتوه.. ڨالولو برّوحْ
ڨال امتهنو العبث.. ماشي لسبخة في القيروان يحكيلها على مدينة طبية
ڨال يستعملو في المساجد.. مشا للجامع يعارك ويسب في البرلمان ويوصف في الشعب بالنفاق ويخطب بحذا المنبر
ڨال مجموعة من الفاسدين.. جاب لينا رئيس حكومة عندو تضارب مصالح ووزرة فاسدين واحد منهم هانو شاد الحبس
ڨال عبثتو بالدولة… قطع الطريق على حكومة الحزب الأول، عمل بؤرة مساندة ليه داخل البرلمان، قدم رئيس حكومة وقال ما تزكوشو، وحاط العصا في العجلة عندو شهور
ڨال يتآمرو مع جهات اجنبية.. ظهر عندو علاقات في الظل مع العصابة الي تقود الثورة المضادة في المنطقة، عطاتو التلقيح وسكت هو وسكتت العصابة من غادي.
تعرف شنو معناها يعطيك محمد بن زايد ويزيد يتكتم عليك؟!
معناها الأخطبوط بدا يشد عليك في الاوراق باش يولي يحرك فيك كيف الروبوت
وتقريب النت موجود وأرشيف المجلات الامريكية والفرنسية الي نشرت على طرق بن زايد في السيطرة على صناع القرار في بلادهم متوفر، كيفاش تبدا العملية بنُزل دبي وشقروات اوكرانيا والتصوير السري، وتنتهي بالصفقات السرية المشبوهة.
ويعطيه الصحة محمد قاسمي كي ڨال :
السّرج خذاه بهيمنا من غير شكيمة،،،
الثعلب هو زميمنا و الصيد يقْيمه،،،،
تاعب صار نحيف**
غرّرد فيها بومها و الضّبع عفيف**
و هرْ الريح ربيعنا نعيشوه خريف**
دنيتنا بالكيف**

فقْلب شتاها شاعلة و تبرد في الصّيف*

نصرالدين السويلمي