تعليقا على قرار الحجر الصحي الذي قررته الحكومة علق الدكتور ساسي قيصر بان هذا الحجر سيكون الافشل منذ بداية الجائحة .
وكتب الدكتور على صفحته بالفيس بوك قائلا:
حسب تقديري، هو أفشل حجر صحي شامل باش يعرفوا العالم منذ بداية وباء كورونا. هذا القرار المتسرع باش يعطي نتيجة سلبية! لأنه كيف تبدى عندك مؤشرات إنتشار وباء مرتفعة جدا، و ضغط كبير على طاقة إستعاب المستشفيات، و أقل من 5 % من الشعب ملقحين، من الخطر الشديد انك تتسبب، في تحرك كبير للمواطنين بين الولايات. تونس عندها خاصياتها و أكثر من 200 ألف نسمة فيها تعمل خارج ولاية الولادة ، هذا دون إعتبار الطلبة. يعني على الأقل سوف يتحرك 50 ألف نسمة لقضاء العيد مع العائلة. فيهم الآلاف باش يحتكوا مع بعضهم في النقل العمومي في ظرف وجيز يقل على 48 ساعة. الحجر الصحي الشامل سلاح ذو حدين و ماهوش joker يتمد وقت ما نحبو. عندما تقرر إعلان الحجر الصحي الشامل، في بلاد فيها برشة هجرة داخلية، و تنقلات طلابية كبيرة، يلزم تكون عندك الشجاعة اللازمة و تختار حل من الإثنين : – تمنع التنقل بين الولايات قبل إعلان الحجر الصحي. اي نعم ! و تصارح العباد بدون لغة خشبية : الوضع خرج على السيطرة و باش نعملوا حجر صحي شامل و اللي يخدم بعيد على دارهم ماهوش باش ينجم يروح في هذا العيد ! – او تعمل، كيف ما يقول العلم و كل التجارب اللي عرفها العالم ،حجر صحي شامل بأربعة أسابيع و هكة يطيح الوباء على قاعدة.لكن تقلي بلاد فيها إنتشار للفيروس فاق كل مراحل الخطورة، و كيف الأمور تحسنت شوية، تقوم انت tu déclenches زوز تحركات، ذهاب و إياب، للألاف من المواطن بين كل ولايات الجمهورية في أقل من عشرة أيام، باش تعمل حجر صحي بأسبوع، نقلك هذا قرار يمكن ان ينجر عنه ما لا يحمد عقباه ! إنشاء الله نطلع أني الغالط.
