free page hit counter
اخبار دوليةمنوعات

قناة السويس .. شريان التجارة العالمية …

قناة السويس ، شريان التجارة العالمية…
تو أيامات والدنيا واقفة في قناة السويس في مصر، باخرة على ملك شركة يابانية ضربت في حافة القناة ومالت وسكرت الثنية على البواخر الأخرى.. #السلطات_المصرية لتو لا نجمت تحل المشكل، الباخرة توزن آلاف الأطنان مليانة بالحاويات conteneurs ومانجموش يحركوها! أكثر من 150 باخرة شادين الصف يستناو باش يتعداو، ومن جرة الحادث هذا حتى أسعار النفط شهدت ارتفاع، باش تفهموا قداش هالقناة هذه أساسية وإستراتيجية للاقتصاد العالمي!
ما دام الجماعة لاهين في تسريح الباخرة، قلنا نستغلوا الفرصة ونحكيولكم حكاية قناة السويس وكيفاش بدات! تبعوا معانا.

الساعة #يجيشي_لبالك انو قناة تربط بين المتوسط والبحر الأحمر موجودة من وقت الفراعنة!؟ أي نعم، إسمها قناة الفراعنة أو قناة سيزوستريس، تعملت عام 1850 قبل الميلاد!! وكانت تربط المتوسط بالبحر الأحمر عبر قناة نهرية تتعدى على الدلتا. وبعد الإمبراطور الروماني تراجان صلحها وعاود استعملها في القرن الثاني ميلادي. عام 1508، تجار #البندقية قالوا أحنا مستعدين نمولوا المشروع لحفر وتوسيع نفس القناة القديمة مرة أخرى، خاتر وقتها طريق الهند عبر الرجاء الصالح تحت سيطرة البرتغاليين. لكن بالطبيعة مشروعهم ما شافش النور.

عام 1798، بدات الحملة الفرنسية على #مصر بقيادة الجنرال #بونابارت #Bonaparte وفي نفس الفترة، كانوا الفرانسيس يفكروا في إنشاء قناة جديدة بحرية تعوض النهرية القديمة.

عام 1854، وصل الديبلوماسي الفرنسي #فرديناندديليسيبس #Ferdinand_de_Lesseps لمصر مع ثلة من المهندسين باش يدرسوا المشروع. وتفاهموا على مسار الممر اللي يبدا من مدخل مدينة بورسعيد حاليا (اللي تأسست في نفس الفترة) ويوفى في المخرج في مدينة #السويس إلى #البحرالأحمر على طول تقريبا 193 كم (اليوم البواخر تبقى 11 ساعة باش تشقوا بعد مشروع التوسعة الجديد الأخير). وتأسست وقتها #الشركةالعالميةلقناةالسويسالبحرية عام 1859، واللي تاخوا #الحكومةالمصرية 15% من أرباحها.

الأشغال بدات عام 1859، وحتى لعام 1864، كانوا يستعملوا يد عاملة مجانية واللي هوما الفلاحين والمزارعين اللي يشاركوا في صيانة قنوات #النيل بعد كل فيضان. ماتوا منهم الآلاف من طبيعة العمل القاسية و #بريطانيا استغلت الفرصة باش تفضح الحكاية (خاتر كانوا مش عاجبهم إنو #فرنسا هي تخدم المشروع). عاد بعدها، بطلوا من استعمال اليد العاملة من الفلاحين وجابوا يد عاملة أغلبها أجنبية من #اليونان و #إيطاليا. يوم 15 أوت 1869 وفات الأشغال وتخلطت مياه #البحرالمتوسط بمياه البحر الأحمر ويوم 17 نوفمبر من نفس العام، تم تدشين قناة السويس رسميا. أشغال قعدت عشرة سنين وتكلفت ضعف التكلفة الأصلية لكن قناة باش يكون ليها تأثير جوهري في #الاقتصادالعالمي كيما تشوفوا اليوم.

وبالرغم من إنوا البريطانيين كانوا نوعا ما غايريين من الفرانسيس خاتر هوما حفروا القناة، كانوا أول من استعملها في رحلاتهم من بريطانيا للهند (وقتها مستعمرة بريطانية) وقصرت وقت الرحلة بـ10 أيام (وقت اللي كانوا يحبلهم 24 يوم باش يدوروا تحت إفريقيا عبر رأس الرجاء الصالح، على قناة السويس ولات الرحلة تدوم 14 يوم برك!).
على قد ما هي مهمة القناة هاذي، الرئيس المصري #جمالعبدالناصر أعلن تأميمها سنة 1956، يعني فكها من عند الشركة اللي مالكتها ورجعها على ملك الشعب المصري… الحكاية هاذي ما تعداتش بالساهل طبعا، وتكون حلف ثلاثي ضم فرنسا المتضرر الأكبر وبريطانيا وإسرائيل وقصفوا بورسعيد، وتسمات الحرب هاذي #العدوانالثلاثي وإلا #حربالسويس… لكن مع هذا قعدت القناة مصرية !

وآخر حاجة مهمة صارت في القناة هاذي كانت توسعتها في عام 2015 باش ولات تنجم تعدي سفن أكبر، وولات مزدوجة في جزء كبير منها، يعني تسمح بمرور زوز سفن في نفس الوقت باش تنقص وقت الانتظار على السفن هاذم. طبعا السفن اللي تتعدى الكل تدفع رسوم للدولة المصرية اللي تعتبر مداخيل القناة من أهم مصادر تمويلها !

اظهر المزيد

مقالات ذات صلة

اترك تعليقاً

زر الذهاب إلى الأعلى
error: Content is protected !!