القاضية كلثوم كنو تروي حادثة طريفة مع شاب متهم بإستهلاك مادة الزطلة :
كيف كنت نجلس في الدائرة الاستئنافية الجناحية فما مرة جانا ملف استئناف حكم موضوعه مسك واستهلاك مادة مخدرة و السيد محكوم عليه بعامين سجن وبخطية بالفين دينار. والي حكم عليه ما نحبش زادة نذكره أشهر من النار على علم والحكم صدر قبل ماتجي نتيجة الاختبار.. كيف حضر قدامنا المحكوم عليه المستأنف وقتها نتيجة التحليل تضافت للملف سألو رئيس الدائرة قالو ولدي انت استهلكت الزطلة؟ قالو المتهم نعم سيد الرئيس.. قالو إستهلكت من القطعة الي تم حجزها عندك ؟؟؟ قالو المتهم ايه استهلكت منها ثلاثة مرات.. قالو الرئيس ديما تشري من عند نفس الشخص والا من عند ناس أخرين؟ قالو ديما نشري من عند واحد اكاهو مالحومة.. قالو الرئيس وباش تحس كيف كل مرة تتكيف ؟؟؟ قالو المتهم نحس بروحي نتفرهد ونعمل جو.. قالو الرئيس يا ولدي راهو صاحبك الي تشري من عندو راهو غشاش وغشك ما باعلكش الزطلة باعلك سلعة مضروبة وراهو الي حسيتو من تفرهيد وشيخة هذيكا موش شخية الزطلة أنت شايخ بطبيعتك وتحليلك راهو سلبي والقطعة المحجوزة ماهيش زطلة.. ياخي أنا تلفت للرئيس وقتلو و انا نوشوش: مالا السيد يمشي يقدم شكاية من أجل الغش هههه… ايا سيدي في الجلسة حكمنا بنقض الحكم الابتدائي والقضاء من جديد بعدم سماع الدعوى، بعد ما الطفل عدا تقريبا 4 أشهر موقوف
-
-
-
-
-
-
-
-
